Zindagi hamain bohat kuchh sikhati hai, ab yeh hum pe hai k hum apni zindagi ke experiences se seekhi hui baaton ko kitna yaad rakhtay hain aor kitna us pe amal kartay hain. Aksar log flexible tabiyat ke hotay hain, jo life mein bohat sari important baatein seekhty to hain, lakin thori der ke baad, waqt ke sath sath, sab kuchh bhool jaty hain, un dosto pe waqti tor pe to quotes or dusri achhi achhi batein to bohat jaldi asar karti hain, lakin zyada der tak woh un baaton ke asar ko zehn me nahi rakh paaty. Un dosto ko chahye ke apne zehn ki halki phulki training karty raha karein, aor achhi achhi motivational urdu quotes daily parha karein.
Aksar hum facebook pe bohat sari, pyari pyari, urdu quotes parhtay hain, jo hamain bohat inspire karti hain, hamain zindagi me kuchh karnay ka jazba deti hain, aisi baatein parhny ke bad dil karta hai k banda aisi aisi aor quotations parhy aor khud ko aor motivate karay, lakin phir sath hi hum dubra se Facebook ki dunya me gum ho jaty hain.
Facebook pe yaqeenan bohat sary aisy pages hain jo rozana inspirational urdu quotes post karty hain, aor un pages ke fan like bhi karty hain, lakin aisa mumkin nahi ho pata k har banday ki soch ke hisaab se quotes post kiye ja rahy hon. Aksar Page admins apne Facebook page pe urdu quotes apni zaati zindagi ke hisaab se hi post karty hain.
Mumkin hai apko urdu quotes education waly topic pe chahye hon, ya ho sakta hai apko sirf famous urdu quotes chahye hon jo na to sad life related hon, na hi dukhi poetry jese sound karty hn. Aisy quotes dhoondhna mushkil ho jata hai Facebook pages pe. Isliye is blog post mein, hamari koshish hai k the best urdu quotes ki sab se bari collection ki jaye jo aisy tamaam quotations, golden words, urdu aqwal e zareen post kiye jayein jo hum sab ki life ke related hon.
Kyun k zyada tar log ab Roman Urdu (Urdu language written in English fonts) achhy se samjh jaty hain, isliye yeh quotes roman urdu mein pesh kiye jary rahy hain. Aap yeh urdu quotes facebook ya twitter pe bhi easily update kar sakty hain. Painful memories se le kar wisdom quotes tak, ham ne tamaam behtreen golden quotes ki collection ki hai. Read these heart touching urdu quotes that will hopefully relate to your deep emotions.
Motivation (hosla, jurrat, jazba, josh)
* Kashti sehra pe sab se zyada mehfooz hoti, lakin kashtiyan sehra ke liye nahi banai jati.
* Sabar karnay walon ko sirf utna hi milta hai jitna Koshish karnay walay chhor dete hain.
* Nakaami ka khauf, Nakaami se zyada khatarnaak hota hai.
* Apne aaj ko behtar banana hi aanay walay kal ki behtreen tayyari hai.
* Dunya tumhein us waqt tak nahi hara sakti jab tk tum khud na haar maan lo.
* Jab kisi cheez se khatra mehsoos karo to us se bhago mat, uska saamna karo, kyun ke
khatra khauf se behtar hai.
* Kamyaab log apne faislon se dunya badal dete hain, aor kamzor log dunya ke darr se
apne faislay badal dete hain.
* Logo se sath nahi diya to dukhi mat hona, Khwuaab tumhare hain, koshish bhi tumhein hi karni paregi.
* Apne sath kabhi bhi haaray hue shakhs ki tarah baat mat karo.
* Tum wese hi ho jesa tum apne baray me sochtay ho. Agar nahi bhi ho to tum apne apko convince kar hi logy.
* Har woh cheez jo tum soch saktay ho, haqeeqat ban sakti hai.
* Aor jab tum kisi cheez ko shiddat se chahty ho, to puri kainaat tumhein us se milany me jurr jati hai.
* Chhotay zehno mein hamesha khwuaish aor baray zehno mein hamesha maksad hotay hain.
Inspire (dil moh lena, maail karna)
* Logo ko "duaaon mein yaad rakhna" kehne se behtar hai aisa kaam karo k log tumhein duaaon mein yaad rakhein.
* Zindagi mein apna woh mukaam peda karo k zinda raho to log tumhein dil se khush ho k milein, aor agar mar jao to log sachay dil se tumhein yaad karein.
* Pehle khud mein woh tabdeeli lao jo tum dunya mein dekhna chahty ho.
* Khwuaab dekhne pe umar ki koi qaid nahi.
* Zindagi ka maqsad khud ki talaash hi, balkay apne aapki pehchaan hai.
* Woh kaam karo jo tumhara dil kehta hai, dunya ki tanqeed se to tum na aisy bach sakty ho na wese.
* Dunya mein kabhi kisi achhay insaan ki talash mat karna, balkay khud achhay ban jao, ho
sakta hai apke is kaam se kisi aor ki talaash khatam ho jaye.
* Ehm din woh nahi tha jab aap dunya mein aye, balkay woh din ehm hoga jab aap yeh log logy ke aap is dunya mein kyun aor kis maksad ke liye aye ho.
Success (kamyabi)
* Kamyaabi insaani ko badalti nahi, balkay benaqaab karti hai.
* Mehnat itni khamoshi se karo ke apki Kamyaabi logo me hulchul macha de.
* Ghareeb peda honay pe apka koi bus nahi, lakin ghareeb reh k ghareeb hi mar jana apka kasur hai.
* Kamyabi ka diya apke khoon paseenay se jalta hai.
* Hakeeki tor par kamyaab shakhs dusro ko bhi kamyaab dekhna chahta hai.
* Dushman banany keliye larai jhagra zaruri nahi. Bus itna hi kafi hai k aap thoray kamyaab ho jayein, phir dekhiye dushmani kheraat mein mil jayegi.
* Maazi to khair koi nahi badal sakta, magar HAAL aor Mustaqbil hamesha insaan ki muthi mein hotay hain.
* Zindagi musalsal imtehaan ka naam hai. Yahan dus baar girnay ke bad gyarwi bar uth janay ka naam kamyaabi hai.
* Waqt se pehle aor kismat se zyada kabhi nahi milta.
* Khushfehmiyon ki ainak jab utarti hai to har cheez saaf dikhai deti hai, hatta ke apni okaat bhi. Kamyaab wohi hai jo is ainak ko waqt se pehle utaar lay.
* Zindagi mein hum zaroor kamyaab ho saktay hain, agar hum un naseehaton par amal karlein jo hum doosro ko dete hain.
Relationship (rishtay)
* Kabhi kisi ko jaan boojh kar azmaish me mat dalo. Ho sakta hai woh kisi majboori ki waja se apki azmaish pe pura na utray, aor tum us se badgumaan ho betho.
* Apno ko hamesha apni mojoodgi ka ehsaas dilaty raho, warna waqt unhein apke bina hi jeena sikha dega.
* Agar kisi ko ghuroor ho k woh jitni bar bhi ruthayga tum usay mana logay, to us ka yeh ghuroor tootne mat do.
* Jab koi shakhs naraazgi khatam karne me pehal karay to uska yeh matlab nahi ke woh ghalat tha, balkay uska matlab hai k uski nazar me tum usay apni anaa se bhi zyada aziz ho.
* Rishtay tornay ka mashwra to koi bhi de sakta hai, magar rishtay jornay aor nibhany ki targheeb koi ba-shaoor shakhs hi de sakta hai.
* Rishtay nibhany ka zarf na ho to rishtay bananay se bhi guraiz karna chahye.
* Waqt mitti daal deta hai. Yaadon Par. Maazi Par. Aarzoo Par. Ghaltiyon Par. Chahton Par.
Yahan tak ke rishton par bhi.
* Rishtay kharab honay ki aik waja yeh bhi hai k log jhukna pasand nahi karty.
* Takabbar se paak guftgu, mufaad se paak mohabbat, laalach se paak khidmat, khud gharzi se paak dua, sachay rishton ki daleel hai.
* Rishtay aor sheeshy, dono hi insaani ghaflat se toot te hain. Hamain yeh yaad rakhna chahye keh sheeshy ka mutbadil mil jata hai, magar rishton ka mutbadil nahi milta.
Forgiveness and Mistakes (maafi, ghalti)
* Logo ko is tarah maaf kar diya kar diya karo jis tarah apne Rab se ummeed karty ho k woh tumhein maaf kar dega.
* Dil ke darwazy kabhi bhi kisi par mukammal band nahi karnay chahye. Ghaltiyan insaano se hi hoti hain. Baaz log wapis lotna chahty bhi hain, lakin unhein darwazy band milty hain.
* Rishton ki rassi tab kamzor hoti hai jab insaan ghalat fehmi mein peda honay walay sawaalon ke awab bhi khud hi bana leta hai.
* Kisi ki narazgi ko itna tool na do k usay tumhare baghair jeenay ki adat ho jaye.
Comments
Post a Comment